बाग्लुङः धौलागिरी अस्पतालका मेसु  डा. रवि रञ्जन प्रधानलाई अस्पताल व्यवस्थापन समितिका सदस्य कृष्णशंकर श्रेष्ठले हातपातको प्रयास गरेको आरोपमा व्यवस्थापन समितिका सदस्यलाई प्रहरीले नियन्त्रणमा लिएको छ । 

मेसु प्रधानले श्रेष्ठबाट आफूमाथि हातपात भएको भन्दै प्रहरीमा निवेदन दिएपछि प्रहरीले आइतबार श्रेष्ठलाई नियन्त्रणमा लिएको हो । जिल्ला प्रहरी कार्यालय बाग्लुङका अनुसार आइतबार दिउँसो श्रेष्ठलाई सोधपुछका लागि प्रहरी कार्यालय झिकाइएको हो । कार्यकक्षमै रहेका बेला श्रेष्ठले गत बिहीबार दिउँसो आफूमाथि गालीगलौज र 
दुर्व्यवहार गरेको डा. प्रधानको आरोप छ । धम्की दिने र कुटपिटको प्रयास समेत भएको डा.प्रधानले प्रहरीलाई दिएको निवेदनमा उल्लेख गरेका छन् । 

डा.प्रधानले स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन २०६६ अनुसार कारबाहीको माग गर्दै प्रहरीमा निवेदन दिएका थिए ।घटनाका विषयमा थप अनुसन्धान भइरहेको प्रहरीको भनाइ छ ।