काठमाण्डौः काठमाण्डौ विश्वविद्यालय (केयु)ले संचालन गरेको एमबीबीएसका दुई बिषयको प्रश्नपत्र परीक्षा अगाबै बाहिरिए पछि परीक्षा नियन्त्रण कार्यालयले दुईवटा विषयको पुर्नपरीक्षा लिने भएको छ । आइतबार सूचना जारी गर्दै गत मे ५ र १० मा संचालन भएका दुई विषयको पुनः परीक्षा लिनु पर्ने भन्दै नयाँ तालिका सार्वजनिक गरेको छ ।
नयाँ तालिकामा फाइनल एमबीबीएसको मेडिसिन एण्ड एलाइड (डर्माटोलोजी) १ को आगामी १६ मे कादिन विहान १० देखि दिउसो १ बजेसम्म र थर्ड एमबीबीएसको कम्युनिटी मेडिसिन विषयको पनि १६ मे दिउसो २ देखि २ः३० बजेसम्म लिने गरी नयाँ तालिका सार्वजनिक गरेको हो ।
केयु स्कुल अफ मेडिसिनका डीन प्रा.डा.मनोज हुमागाईँले यी दुई विषयका परीक्षाको प्रश्नपत्र बाहिरिएको परीक्षा समितिले ठहर गरेपछि पुनः परीक्षा लिने निर्णय गरेको बताए ।
‘यी सुरुकै परीक्षा थिए, परीक्षामा प्रश्न पत्र आउट भएको भन्ने हल्ला चल्यो । हामीले तत्कालै यत्तिकै रद्ध गर्न पनि मिलेन । परीक्षा समिति बस्यो र ट्याली गर्दा हल्लामा केही सत्यता पनि देखियो र पहिलेको परीक्षा रद्ध गरी पुन लिने निर्णय भयो,’ उनले भने ।
डीन प्रा.डा. हुमागाईँले त्यस पछिका विषयमा दोस्रो सेटबाट सञ्चालन गरिएको समेत सुनाए । ‘परीक्षामा पहिलो सेटमा समस्या भएको हल्ला चलेपछि हामीले बाँकी परीक्षा अर्को सेटबाट लियौँ तर सुरुकै केही विषय भने पुन परीक्षा लिने निर्णयमा पुग्यौँ,’ उनले भने ।
प्रश्नपत्र आउट हुँदै गर्दा ठूलो रकम चलखेल भएको हल्ला समेत चलेको थियो । प्रा.डा.हुमागाईँले प्रश्नपत्र आउट भएको विषय काभ्रे प्रहरीले छानवीन गरिरहेको भन्दै सबै सत्यतथ्य प्रहरीले सार्वजनिक गर्ने विश्वास व्यक्त गरे ।
केयूको बिश्वसनियतामा नै प्रश्नचिन्ह आउने गरि प्रश्नपत्र आउटका सन्दर्भमा छानबिन गरी आवश्यक कारबाही प्रक्रिया अगाडी बढाउनु पर्नेमा सर्वसाधारणले पनि जोड दिएका छन ।
