काठमाडौँ: निवर्तमान प्रधानमन्त्री पुष्पकमल दाहाल (प्रचण्ड)ले चिकित्सा शिक्षा आयोगमा दुई जना सदस्य मनोनित गरेका छन् । उनले मनोनित गरेका ती दुई सदस्यहरुलाई आयोगको कार्यकारी समितिमा समेत सदस्य बनाएको बुझिएको छ ।
त्यसरी सदस्य हुनेहरुमा प्रधानमन्त्री प्रचण्डका निजी चिकित्सकको रुपमा रहेका पाटन स्वास्थ्य विज्ञान प्रतिष्ठानका मेडिकल डाइरेक्टर प्राडा युवराज शर्मा र त्रिभुवन विश्वविद्यालय चिकित्साशास्त्र अध्ययन संस्थान आईओएमकी पूर्व सहायक डीन तक्मा केसी रहेका छन् ।
आयोगको अध्यक्षले रिक्त रहेको नागरिक समाजका लब्ध प्रतिष्ठित व्यक्तिहरूमध्येबाट कम्तीमा एक महिलासहित दुई जना नियुक्त गर्ने व्यवस्था भए बमोजिम उनीहरुलाई नियुक्त गरिएको बताइएको छ ।
आयोगका उपाध्यक्ष प्राडा अञ्जनीकुमार झाले दुई जना सदस्य मनोनित भएको पुष्टि गरे । कार्यकारी समितिमा मनोनित भएको भन्नेबारेमा भने आफूलाई औपचारिक जानकारी आई नसकेको बताए ।
स्रोतका अनुसार प्रचण्डले सदस्य नियुक्त गर्दै सोही दिन उनीहरुलाई सदस्य मध्येबाट कार्यकारी परिषदमा मनोनित गरेका हुन् ।
