काठमाडौँ: स्वास्थ्य तथा जनसंख्या मन्त्री प्रदीप पौडेलले अहिलेको ऐन तथा नीतिबाट स्वास्थ्य बीमा कार्यक्रमलाई प्रभावकारी हुन नसक्ने बताएका छन् । प्रतिनिधि सभा बैठकमा सांसद प्रेम सुवालले सोधेको प्रश्नमाथि सोमबार जबाफ दिँदै मन्त्री पौडेलले अहिलेकै ऐन नीति, नियमले स्वास्थ्य बीमा कार्यक्रम धेरै व्यवस्थित हुन नसकेको भन्दै सरकारले त्यसलाई प्रभावकारी बनाउन सम्बन्धित पक्षसँग छलफल गरिरहेको बताए।
स्वास्थ्य उपचारमा सहज बनाउनका लागि आम नागरिकलाई स्वास्थ्य बीमा कार्यक्रममा समेटन सरकारले अध्ययन गर्न छुट्टै समिति बनाउने तयारी पनि गरिरहेको मन्त्री पौडेलले बताए।
‘अहिलेकै नीति, नियम भित्र बीमा धेरै व्यवस्थित हुने स्थिति छैन। त्यसैले बीमा सम्बन्धी ऐन परिवर्तन गर्ने, नीति, नियम परिवर्तन गर्ने, यसलाई थप व्यवस्थित बनाउन जरुरी छ,’ उनले भने।
उनले स्वास्थ्य बीमाको दायरा फराकिलो बनाउने, संगठित क्षेत्र सबैलाई बीमामा आवद्ध गर्ने, त्यसको स्रोत सुनिश्चित गर्नका लागि सरकारले अरु थप पक्षलाई कसरी जोड्न सकिन्छ भन्नेबारे पनि गृहकार्य गरिरहेको उनको भनाइ छ।
मन्त्री पौडेलले सबै उपचार सेवा दिईरहेका सबै जसो अस्पताललाई उपचारवापतको रकम सोधभर्ना गर्न ठूलो बाँकी रहेको समेत स्वीकारे ।
